Jeans Banned

وہ ملک جہاں جینز پہننے پر پابندی لگادی گئی کیونکہ۔۔۔

پیانگ یانگ(مانیٹرنگ ڈیسک)شمالی کوریا کے شہری دنیا میں تنہائی کی زندگی گزار رہے ہیں اور ان کا بیرونی دنیا کے لوگوں سے انتہائی کم رابطہ ہوتا ہے۔ ملک کے دو صوبوں شمالی ہیمگ یانگ اور یانگ گانگ کی سرحدیں چین کے ساتھ ملتی ہیں لہٰذا ان صوبوں کے عوام باقی ملک کی نسبت بیرونی دنیا سے زیادہ رابطے میں رہتے ہیں۔ یہی وجہ ہے کہ ان دو صوبوں میں مغربی طرز لباس مقبول ہے۔ اب شمالی کوریا کے حکمران کم جونگ ان نے ملک میں جینز سمیت دیگر مغربی ملبوسات پر پابندی عائد کرتے ہوئے ان دو صوبوں میں کریک ڈاﺅن کا حکم دے دیا ہے۔ برطانوی اخبار ڈیلی میل کی رپورٹ کے مطابق ملک میں خواتین کے ناک اور کان چھیدوانے پر بھی پابندی عائد کر دی گئی ہے۔
برطانوی اخبار کا کہنا ہے کہ کم جونگ ان نے مذکورہ صوبوں میں وفادار نوجوانوں پر مشتمل چھاپہ مار گروپ تشکیل دے دیئے ہیں جو سکولوں، کالجوں و دیگر مقامات پر چھاپے ماریں گے اور یقینی بنائیں گے کہ کوئی شمالی کورین شہری مغربی لباس نہ پہنے۔ یہ گروپ سکرٹ کی لمبائی، جوتوں کے سٹائل، ٹی شرکٹس اور ہیرسٹائل پر نظر رکھیں گے۔ شمالی کورین رپورٹرز کے ساتھ رابطے میں رہنے والے جاپانی صحافی اشیمارو جیرو(Ishimaru Jiro) کا کہنا ہے کہ ”شمالی ہیمگ یانگ اور یانگ گانگ کے شہری بڑی تعداد میں مغربی ملبوسات سے متاثرہیں۔ چند ماہ بعد شمالی کوریا کے ایٹمی طاقت بننے کا سالانہ دن منایا جا رہا ہے۔ تب تک ان صوبوں میں یہ کریک ڈاﺅن جاری رہے گا۔
رپورٹ کے مطابق کچھ ماہ قبل کم جونگ ان شمالی کوریا کے مردوں کے لیے حکم جاری کر چکے ہیں کہ وہ ان کے بالوں کے سٹائل کی نقالی کریں اور اپنے بالوں کی لمبائی 2سینٹی میٹر سے زیادہ نہ ہونے دیں۔ خواتین کے لیے انہوں نے ہدایت جاری کی تھی کہ وہ ان کی بیوی ”ری سول جو“(Ri Sol Ju) کے طرزلباس کی پیروی کریں۔ کم جونگ ان نے حکم دیا تھا کہ جن مردوں کے بال مقررہ حد سے زیادہ لمبے ہوں یا ان کا سٹائل مغربی ہو، زبردستی کاٹ دیئے جائیں۔ برطانوی اخبار کے مطابق شمالی کوریااپنے ایٹمی طاقت بننے کی سالگرہ پرمبینہ طور پر 5ویں ایٹمی تجربے کی تیاری کر رہا ہے۔ یہ تجربہ بھی اسی جگہ پر کیا جائے گا جہاں پہلے چار تجربے کیے گئے۔ رپورٹ کے مطابق اس پانچویں ایٹمی تجربے کی تیاریاں آخری مراحل میں ہیں۔